NAKITA KO IKAW NYOR ERNING

Nakita ko ikaw Nyor Erning sa paguho ko pa lang sa tren sa Jurong East. Sa dihang gisugat ako sa bugnawng kahayag sa panon sa mgasuga, ug akong nakita nga nibuhayag ang mga bulok itom, dag, kape, puti sa nagkalainlaing mga paa sa itom, dag, puti, kape, mas itom, mas puti, mas dag, mas kape nga mga paa sa mga nagpakigol nga mga batan-ong mga babaye sa istasyonan sa tren. Nakita ko ikaw nga nikanaog sakay sa escalator maong nisunod ako sa imong padulngan nagpahipi lamang sa imong luyo. Unya nakita ko ikaw nga nisulod sa taboan sa Jurong East ug gisugat na sab ko sa pista sa mga bulok pula nga mga kamatis, lunhaw nga mga pitsay, mga dag, puti, kape, itom nga mga hubag nga mga batan-ong mga babaye. Ubos sa init kaayong kahayag sa panon sa bombelya sa mga suga. Nagpawng siga ang kahayag sa nagkaopaw na nimong ulo sa matag labay nimo sa mga suga. Paw'ng siga ang nagkasinaw na nimong ulo. Ug nakita ko ikaw nga nitagsa-tagsa'g pili sa mga kamatis pula kaayong mga kamatis nya imong gihinolhinol ang hamis kaayo niining panit. Ug naaninag ko sa imong baba ang nihulma nga pahiyom. Nya ang mga hinog kaayong mga kapayas dagko kaayong mga hinog nga mga kapayas ang imong gisunod sa pagsusi. Hubag kaayo ang mga kapayas oo hubag kaayo ang mga kapayas nya akong nakita nga nagpanlad-ok ka. Nya pagkataud-taod nilakaw ka padulong sa mga kan-anan. Unya nasimhot ko ang pista sa nagkalainlaing kahumot sa mga pagkaon. Adunay hait nga kahumot sa chicken curry, sa tinabal nga gisagol sa rice claypot, sa fried hokkien me, sa laksa, sa satay, sa kambing, fish head soup, sa bakur teh, sa chicken biryane , chicken rice, lontong ug uban pa. Ug nakita ko nga niabot ang imong gi-order nga lontong. Nag-aso-aso sa kainit ang tuno niini. Ang mga puso naglutaw sa kalami. Apan nganong usa ra man ang nagsinaw nga itlog nga nagbitay sa bugan sa tulo ka puso sa imong lontong? Wala kaha ka biroka animal kang dako?