ANG TAWO NGA NAKIGBAYLE SA TIBOOK KALIBUTAN

Lanog pa sa akong mga dalunggan ang imong mga katawa, Noy Roman. Bisan ang imong hulagway nga nag-inom sa usa ka bol nga tuba sa grahean sa MB Liner sa Tagbilaran tina-aw pa sad kaayo. Ikaw ang drayber ug si Papa ang konduktor. Gani ang mga biyahe ninyo matag tabo sa Sevilla ako man gayong atangan matag Sabado sa buntag aron ngadto ko sa pamilya sa akong Mama moduaw matag semana. Ang tingog sa mga nagkagot nga mga bolitas, tarugo og kahoy nga lawas sa higanting trak nga motadlas sa dalan sa Tagbilaran, Baclayon, Albor, Loay, Loboc ug Sevilla sa sayo nga kabuntagon nagtingog pa sa akong hunahuna. Wala ko makalimot nga adto ko nimo pa lingkoron sa imong tupad ug atong drayban ang mga libak sa nuilusak,tiratira,dumog,preskong isda buwad, tinap-anan,tinabal,ginamos, talong, kalbasa, upu, bagu ug uban pang mga utanon.

Kon kamo inday mgangitag hayahay
Ang MB Liner ang sakyi kanunay

Liko sa Kinugitan ang kasadya sa imong higanting MB mosuot ngadto sa Sevilla.
Apan sama sa dahong laya ang tanan nawala nahanaw. Sigurado ko nga nagsugod ang tanan sa dihang ang tibuok Bohol nangatawa sa imong awit nga Magellan. Ug nakita sa usa ka negosyante ang dakong kahigayonan nga mosakay sa tinaginting sa walay brake-brake nimong mga awit. Bisan subo, niadto ko sa imong katapusang tukar didto sa Loay ang lungsod sa akong amahan. Bisan lata kaayo ang tingog sa imong kumparsa ang mga awit bahin sa mga kasinatian sa kinabuhi sa mga sakay sa imong higanting trak maka-ukay lang gihapon sa mga kahimuot. 

pong choyla, chichidi kongkoyla
butsikek ek ek eek
bobo chichang chichidi
kong tong nang
butsikek ek ek eek

Sa sunod nakong balita tua nakas Manila, ug ilado na sa tibuok nasud. Apan ang imong mga awit daw nawad-an sa katin-aw morag nalubog. Morag nawala ang kahimuot sa kinabuhi. Unya nag-awit na ka'g mga awit sa mga tawo nga morag wala pa makasinati sa kasakit og biaybiay sa kinabuhi.


oh mother mother I am sick call the doctor very quick
doctor doctor shall I die tell my mama do not cry

Nawala ang tanan sama sa dubok nga isda sa kamot sa negosyante. Nawala ang Roman nga kusog moagik-ik sa mga tiaw-tiaw sa kinabuhi. Wala man gani ko makabalita sa imong lubong sa Calape kon wala ko manawag ni Papa kagahapon wala ako makahibalo nga wala na ang siaw nga drayber sa mga asoy sa mga siaw nga mga pasahero sa MB. Sama sa dahong laya ang tanan natagak nawala nahanaw.